تكنولوجيا

أحسن إختراعات اتعملت عشان الناس الكسلانة

إسراء الطيب

تفتكر دايما بتكون الحاجة أم الأختراع ولا بيكون الكسل هو السبب الرئيسي، ولا عشان توفر وقت، كل دي أسباب بتكون نتيجتها اختراعات ناس بتشوفها تافهة وناس تانية بتشوفها مفيدة وبتوفر وقت ومجهود ممكن الإنسان يستغله في حاجة تانية.

لكن بتفضل دايما مرحلة معينة من استخدام الاختراعات دي هي اللي بتحددلك ده اختراع خلى الإنسان كسول اكتر ولا وفرله وقته، والمرحلة دي بتتحدد بحاجة واحدة وهي استخدام الانسان للاختراع، هو بس اللي يقدر يحدد مدى فايدته ولازمته في حياته وتأثيره عليه أي، ومن أكتر الاختراعات اللي صنفها ناس كتير إنها اتعملت للناس الكسولة المجموعة دي..

السرير اللي بيتروق لوحده

السرير دلوقت مبقتش محتاج كل يوم تروقه عشان ترجع تاني تبهدله بليل، من خلال جهاز صغير بيتركب في اخر الغطا الذاتي بيخليه يرجع يتفرد لوحده من غير أي تدخل منك. 

شوكة الاسباجتي الكهربية 

للناس اللي بتعاني مع أكل المكرونة الاسباجتي دلوقت بقى في الشوكة الالكترونية اللي بتلف لوحدها من خلال موتور صغير جواها فتلف في المكرونة وتطلع بالمكرونة من غير ما توجع ايدك في اللف

مروحة الإندومي

في دول شرق أسيا زي الصين وكوريا واليابان الاندومي والنودلز عندهم شبه ادمان في الأكل وعشان اللي بيكسلوا يستنوا تبرد اخترعوا مروحة صغيرة تتركب في عصاية الأكل بحجر واحد تبرد معلقة معلقة من غير مجهود منهم. 

المج الغلاية 

المج ده بيساعدك إنك تستغنى عن الغلاية تمامًا خلاص مش محتاجها بقى المج نفسه غلاية مباشرة ويساعدك إن تشرب نسكافية مباشرة من المج وفي اققل من دقيقة وكمان مش بيحتاج يتغطى زي الغلاية وتقدر تتفرج على تفاصيل اكتر فيه هنا في الفيديو ده.

اعمل عضلات وأنت قدام التلفزيون 

للناس اللي بتكسل تروح الجيم وتقعد بالشهور عشان تعمل عضلات للبطن وتقلل الكرش، هيلاقوا شركة اجنبية صنعت جهاز مخصوص عشان يطبعلك العضلات وانت قاعد تتفرج على التلفزيون من غير مجهود.

شير