الترفيه

أفضل أماكن تقضي فيها رأس السنة

إسراء الطيب

خلاص 2017 عدت وبنعد أخر أسبوع فيها، وهتسبنا سنة قديمة وتيجي واحدة جديدة مع فرص أكتر عشان نلحق نحقق كل اللي نفسنا فيه، ونشحن طاقتنا إننا نتحدى أي صعوبات عطلتنا عن تنفيذ أحلامنا.

وبلاش نخلي نهاية السنة زي أي يوم تقليدي عدى فيها، في ناس بترتب من قبلها بفترة وتاخد أخر أسبوع في السنة اجازة وفي ناس طبيعة شغلها بتخليها تاخد يوم أو اتنين بس، طب ازاي نقضي اليوم ده وممكن يكون فين بحيث يكون ذكرى حلوة لليوم يقدر يشحنا طاقة إيجابية ندخل بيها السنة الجديدة.

سانت كاترين 

من الأماكن اللي هتعملك ريفرشن كامل لحياتك ومن التحديات اللي لما بتكملها للأخر بتحس إنك اكتشفت حد تاني كان في شخصيتك، وإنك تقدر تطلع أكتر من 3000 سلمة وتمشي حوالي زيهم صعودا عشان في الاخر تقدر تشوف مشد عمرك ما هتنساه من قمة  القمم المصرية والتلج مغطي الجبال اللي حواليك.

دهب 

من المعجزات الطبيعية اللي ربنا أنعم بيها على مصر من جمال وبحر صافي وسمك وشعب وعالم تاني في قلبها وهدوء وراحة، حاجات كتير صعب توصف الطبيعة اللي بتتميز بيها .

البرج 

لو الدنيا معاك بايظة ومفيش فلوس، اطلع البرج شوف مصر والنيل من فوق وعيش مع الغروب كأنك بتودع كل اللي حصل في 2017 من أحداث ضايقتك وسيبه يغرب مع الشمس واستقبل شمس يوم جديد فيها كل اللي يبسطك.

مرسى مطروح 

على الرغم من الوقت الطويل اللي بتاخده عشان توصل لحد هناك إلا أنها فيها مجموعة كبيرة من الشواطئ اللي تحسسك إنك في كوكب موازي والسهر قدامها متعة تانية تودع بيها السنة 

طالعة لحد اسكندرية 

اسكندرية مش بس بحر وقلعة ومكتبة الأكل هناك كل مدى بيكون أحلى وأحلى والمطاعم بتفتكس كل الأكلات اللي بتيجي من بره غير التمشية على البحر وستانلي والصحاب وتغيير المود كله.

كلمات دلالية
شير