الشغل

أفكار تساعدك تنجز شغلك قبل معاد الشيفت

إسراء الطيب 

دايمًا بتيجي على أخر نص ساعة في الشفت وتتزنق وتكربس الدنيا كلها فوق دماغك ومتكونش عارف تعمل اي ولا اي وبتضطر تقعد وقت أكتر أو تسمع كلمة سخيفة من مديرك ولا لايقولك خلص شغلك وإلا هخصملك ولا يقولك مفيش قبض ولا هلغي الاجازة، كلها اسباب ممكن المدير الرخم يزنقك فيها لو فكرت في يوم كده إنك متخلص الشغل المطلوب كله قبل ما تروح .

النتيجة إنك بتضغط أكتر ويبقى مطلوب منك شغل ومشاوير و100 حاجة لازم تنجزها في اليوم الواحد، طب إزاي ممكن تحاول تهرب من الزنقة دي، هتلاقي في السطور الجية دي كام فكرة ممكن لو عرفت تلتزم بيهم صح هتلاقي نفسك مخلص بدري ساعتين كمان عن معاد الشيفت.

جهز أفكارك من أول الأسبوع

لما بتعمل حسابك أول بأول بيساعدك توفر وقت كل يوم، يعني خصص أول يوم في الاسبوع يكون هو لتجهيز الشغل والخطط الاساسية والأفكار اللي هتمشي عليها باقي الأيام بيوفرلك جهد بدني وفكري وتشتغل وأنت مرتاح. 

رتب وقتك  ساعة ونص، ساعة ونص أو ساعتين ساعتين 

حاول تفصل في وقتك متخليش شغلك طول اليوم من غير فاضل عشان دماغك متنفجرش من ضغط الشغل والعملا اللي بتقابلهم أو المواضيع اللي شغال عليها

خد 10 دقايق بريك منفصلة تفصل فيها وتجدد طاقتك

كل ما كان في استراحة ولو عشر دقايق كل ما قدرت تجدد طاقتك وقدرت تواصل لباقي اليوم، فخد نفسك كده وافصل تماما حتى لو هتقعد في مكانك ثابت الفترة دي المهم تحاول تصفي ذهنك على قد ما تقدر .

 

نسق أفكارك بحيث يكون في شغل تقيل وشغل بيخلص في وقت سريع 

الشغل دايما بيكون في جززء بياخد وقت طويل وجزء بيتعمل على السريع، فحاول توازن ما بين الاتنين على قد ما تقدر ممكن تبدأ بالسهل كله تنجزه فتكون خلصت 50%  من شغلك، وبعدها تدخل على التقيل فيكون معاك وقت وممكن تخلص التقيل الاول اعمل اللي ينجز معاك اكتر حسب طبيعتك.

لو تقدر تحضر اساسيات شغلك قبلها بيوم هيريحك على الأخر تاني يوم

تحضير الشغل بيساعدك إنك تنجز كل اللي وراك في وقت قليل ومجهود أقل وده بيخليك متكونش مضغوط وتقدر تطلع شغل أحسن وجودته أعلى في نفس الوقت

شير