الجواز الحياة

أكتر حاجات بتكسر مقاديف الست

إسراء الطيب 

أغلب الرجالة شايفين إن الست كائن معقد ميتفهمش، وأن  عشان تعمل حاجة تعجبها لازم تتشقلب، وتجيب نجوم السما وغيره من الكلام ده، لكن كل ده مش صحيح، لآن الست دايمًا معروف كلمة ممكن توديها وكلمة تجبها ببساطة، فزي ما هي بتتراضى بالكلمة الحلوة الكلمة برضو ممكن تخليها متعكننة  بالأيام فخد بالك عشان مترجعش تقول الستات نكدية لي؟!

الكام كلمة الجايين من أكتر الجمل اللي الأزواج والأهل ممكن يقولوهم لزوجاتهم او بناتهم وميعرفوش بيكون تأثيرهم أي في حياتها وممكن يخليها مش بزعل أحيانا في بعضهن بتكون جينات الحساسية زايدة وبتنهار من العياط فناخد بالنا احسن من كلامنا ويكون عندنا دم..

إنتي مبتعلميش حاجة

أكتر حاجة بتعصب الست وتخليها تركب  100 عفريت لما يكون طلعان عينها في البيت طول اليوم وانت تيجي على الجاهز تقول إنتي مبتعمليش حاجة، لا ثانية بس ركز قبل ما تقول الكلمة دي، وشوف هي تعبانة ازاي اكلك المعمول وهدومك المغسولة وبيتك متروق كل ده مش بيتعمل لوحده.

أي لازمة شغلك

الست ممكن تبلعلك كتير لحد ما تيجي عند شخصيتها، وشغلها وكده أنت لغيت وجودها، كأنك جبت الكبريت جنب الغاز وولعت في الشقة كلها، واستلم اللي هيحصلك بقى.

مهما عملت مقصره

بلاش تتعامل في حياتك معاها بمبدأ إنها دايما مقصرة، لآن ده بيخليها بدل ما بتعمل حاجتين وتلاتة، تعمل حاجة واحدة او تبطل تعمل خالص عشان تحس بمجهودها اي. 

كبرتي خلاص وراحت عليكي 

كسرة الخاطر بتكون صاعبة أوي عن الست، الكلمة الحلوة بتخليها تحلو وترجع تهتم اكتر بنفسها عشان تسمع كلام حلو أكتر، لكن العكس بيخليها تكتئب وتنكد عليك وعلى كل اللي يعرفك، فبلاش منه احسن.

إنتي مبتفهميش في حاجة

لما تكرر الموضوع أكتر من مرة هتخليها تبطل تفكير فعلا، وكل اللي كانت بتساعدك فيه وبتعمله تلبسك فيه عشان تعرف قيمتها وتبطل تقلل من تفكيرها، أول مرة هتزعل اللي بعدها هتطول في الزعل اللي بعدها مش هتحب تكلمك ولا تتناقش معاك في حاجة.