الجامعة الحياة المدرسة

أماكن فسح هتنسيك شهر الامتحانات

إسراء الطيب 

الامتحانات معروف عنها في كل مراحل التعليم إنها العلقة اللي بتطلع عين الطالب والأسرة معاه وبتخليه يكره دنيته كلها، حاجة واحدة بس بتخفف خنقة الامتحانات، هي اخر يوم في الامتحانات.

بتبدأ المخططات لهنروح فين أخر  يوم امتحان من قبل ما الامتحانات تبدأ اساسًا، وكل شلة بتشوف أي أكتر مكان نفسهم يروحوه والطلعة بتكون على هناك، وعلى حسب المرحلة العمرية بيتحدد برضو هيتراح فين وعلى حسب الاهل سامحين بتاخير لحد أمتى.

في ناس بتبقى واخدة الاذن من أهلها وعاملة حسابها كويس في الفلوس ودي بتنطلق لأكتوبر والتجمع وغيره من الأماكن وفي ناس تانية مرحلة الابتدائي واعدادي بيكون ليهم حدود معينة ميقدروش يعدوها، هنحاول في التقرير نساعدكم في مقترحات خروج اليوم ده، يعني ممكن تخليكوا في برج القاهرة ودريم بارك أو الأزهر بارك.

Dragon Boat 

ممكن تجرب حاجة جديدة لسه معمولة في مصر، وهي تجربة مركب دراجون، للتجديف الجماعي الترفيهي، ومش بيكون شرط إن عندك خبره قبل كده عشان معاك كوتش هياخد 10 دقايق من وقتك يعرف كل الطريقة وأهم التعليمات، هتقعد في الماية حوالي ساعة من المتعة والتجربة الرايقة والفصلان عن الواقع، لكن أي المختلف بينها وبين أي مركب في النيل، إن أنت بتحس إنك في قلب الماية من كتر ما أنت قريب منها لآن المركب نفسه من نوع المراكب الشبه مسطحة الآمنة وممتعة في نفس الوقت، ومكانها مش بعيد في النادي المصري للتجديف.

zip line

ملكش بقى ولا في بحر وحمام سباحة وتجديف، خلينا نروح للجو أحسن والجبال، ليك في الأكشن، طب حابب تجرب تدخل الصاعقة، حبه تجربي شوية من تدريبات الجيش، هتلاقي كل ده والعاب أكشن تانية موجودة في مكان اسمه zip line ملحق بدير سمعان الخراز في المقطم اللي هو لوحده فسحة من جمال تصمميه والدنيا هناك.

حديقة الأسرة … Family park

 الأزهر بارك بقى فيها ناس كتير وزحمة ممكن تجرب تروح حديقة الاسرة، المكان مش جرد مساحات خضرة كبيرة وخلاص وتتمشي لا المكان فيه 3 أماكن ضخمة ألعاب مختلفة، غير المتحف الحربي وحديقة حيوان، وطريقة مش صعب هتلاقيه في أول طريق الرحاب.

متاحف 

 لو بتحب التاريخ وتتفرج على حاجات غريبة، عندك في مصر متاحف متتعدش، ممكن تروح المتحف الزراعي في الدقي وتشوف فراشات وزرع وعجائب العهد الفرعوني هنا، متحف القوات الجوية في صلاح سالم عند مجمع الجلاء، قصر الأمير محمد علي في المنيل، متحف العلم الحيواني في حديقة حيوان الجيزة، متحف السلاح بقصرعابدين،

شير