الصحاب شارعنا

أنتيمك فرحه قرب.. اعرف ازاي توجب معاه

إسراء الطيب

صاحبك فرحه قرب، صاحبة عمرك خلاص هتجوز وتشوفيها بالفستان الأبيض، مضغولين أي أفضل هدية ممكن تخليهم يتبسطوا، مش عاييزين تدوهم فلوس وخلاص زي أي حد، ولا عايزين تجيبوا هدية ملهاش لازمة عندهم ، ولا تجبله هدية سكة يفضحك، سيبك من كل ده وتعالى نفكر في الهدية اللي تخليه يقولك حبيبي بصوت حسن حسني.

فكر في الجديد

كل ما هديتك تكون مختلفة ومميزة أكيد هيكون مبسوط وفرحان بيها، ولو خلتها حاجة معمولة ليه مخصوص هتلاقي الزقططة عليت معاك وبقى طاير بيها، يعني مثلا مممكن تعمله أباجورة على شكل بوكس خشب محفور عليها اسمه هو وعروسته، أو ممكن تخليها مثل بروازين خشب محفور صورتهم هما، لو الميزانية بايظة معاك ممكن تعملهم ماجين السحري اللي صورتهم بتظهر لما يكون فيه مشروب سخن، وهكذا حاجة باسمهم، صورتهم، تاريخ جوازهم، صور الفرح. 

جمع صحابك

متخليش حوار الهدية يقف عندك شوف مين من صحابكم ممكن يقدر يساعد ويجمعوا مع بعض ويجيبوا حاجة تقيلة في الجهاز، ميكرويف، تلفزيون، مراوح، أي حاجة يحس إن في حمل اتشال من عليه وفي نفس الوقت هتفضل في بيته طول العمر يفتكرك بيها، ولما العدد بيزيد بيكون فرصة أكبر لهدايا أكتر لآنتيمك ومش هينسهالك.

سرسبه في الكلام

مش ضروري تقولهالك مباشرة كده إن أي ناقصك متحسسوش إنك غريب زي أي حد معدي بيقوله أي ناقصك وخلاص لا اقعد معاه وقوله وصلت لأي وتعالى نعمل لسته باللي خلص واللي لسه، وبعد ما تخلص كتابة اللسته قوله بقى أختار أي اجبهولك منه، أو تقوله الغى بقلا البند ده وده وده دول عندي ومبروكين عليك.

خليك جنبه

الفترة دي بتكون أصعب فترة على العروسة والعريس الضغط بيكون فوق ما تتخيل، وخناقات على أتفه الأسباب اللي في الدنيا، بيحتاجوا في الوقت ده يحسوا أن في صاحب جدع مهتم بالتفاصيل ماشي معاه خطوة بخطوة حتى لو أنت مسافر تابع معاه شات وحاول تدور معاه حتى لو أونلاين.

دورله على أحسن عروض

بص هو هيكون طالعان عينه في اللف على كل التفاصيل وبيدور على أققل سعر وجودة عالية، دعبس معاه، قوله هتلاقي النجف في درب البرابرة، وقولي لانتيمتك أن عند جامع البنات حجات المطبخ، وفي أيكيا عروض تانية وخامات حلو، شوف اللي ناقصه في عروض كارفور والهايبر ماركت كلها طلع أحسن سعر، وأنتيمتك بقى هتيجي عند الفستان شوفلها أرخص سعر للفستان سواء هتشتريه أو هتأجره، شوفي باقي حاجت الفستان والجزمة عرفيها أن في ممر اسمه الكونتينتال في وسط البلد هو اسم الممر مكلكع بس هتلاقي فيه محلات كتير فيها كل حاجات العروسة ومستلزمات الفستان والبدلة ومناديل كتب الكتاب وكل حاجة بدل ما تلف حوالين نفسها.

 

الصاحب الجدع بيبان وقت ما تفكر إنك تحتاجه تلقيه سابقك بخطوة وبيطمن عليك ويشوف أي ناقصك، خليك الصاحب الصح في الوقت الصح اللي مينسالكش وقفتك معاه فيه تسنده وتكون ف ضهره.

 

شير