الفورمة

ازاي تختار جزمتك على حسب شخصيتك

مش هتصدق لو قولتلك أن جزمتك بتحدد شخصيتك، وده لأن في ناس كتير بتعتبر الجزمة مش شيء رئيسي، مجرد مكمل للشكل الخارجي للجسم، بس ده عكس الحقيقة،  لأن الجزمة مهمة جدًا للشباب اللي بيحاولوا يمشوا على تيمة واحدة في الاستايل بتاعهم، مش كدا وبس دي بتظهر شياكتك، مش كدا وبس بيتقال أن البنات بتحكم على الشاب من 3 حاجات: الشعر، الساعة، الجزمة، فحاول تركز على اختيار جزمة تليق على شخصيتك:

الجزمة الشمواه:

الجزم الشمواه دي بتبقى اختيار الناس الكبيرة أو بمعنى ادق المتقدمين في العمر من سن 30 لـ40، وهي بتبقى في معظم الأحيان اختيار شيك وعصري بيليق اكتر عليهم عكس الاستايل الشبابي اللي مابيليقش عليهم خالص.

الكوتشي:

 الكوتشي، من الاستايلات الشبابي، فهو الاختيار الأول لكل الشباب في العالم، عملي وسريع وبيليق على كل الهدوم الكاجوال، وبيليق في معظم المناسبات، اختيار مناسب للناس اللي عايزين يعيشوا بروح الشباب.

الجزمة الكلاسيك:

 الجزم الكلاسيك دي بتبقى اختيار الناس اللي بتميل للكلاسيك والاستايل التقليدي والفورمال، الناس العملية اللي معظم أوقاتها بيقضوها في الشغل والمناسبات المختلفة اللي مش هينفع فيها غير اللبس الكلاسيك.

الجزم اللي فيها أكتر من لون:

 الجزم اللي ليها اكتر من لون دي بيتقال أن اللي بيلبسها الشاب المُفكر وصاحب النظرة البعيدة، يعني العميق بطبعه، ورغم ان في ناس مابتحبش الاستايل ده بس في ناس تانية بتحب تلبس الجزم دي بالذات.

الجزمة اللي لونها غريب: 

الجزم والكوتشيهات اللي لونها غريب دي بتبقى اختيار الشخص المتحرر اللي مايهمهوش رأي حد في العالم، اللي بيكون ماشي بدماغه هو وبيلبس اللي يعجبه هو مش اللي يعجب الناس .

شير