الكراش للرجال فقط

الشتا.. الفصل المناسب عشان تكسب الكراش

إسراء الطيب 

عادة البنات مع بداية دخول الشتا بتلاقي هرموناتها كلها قلبت محن زيادة بتلاقيها حساسه في نفسها لأقل كلمة يعنى تقدر تقول كده الوقت المثال عشان تقولها بحبك وتلاقيها بترد وأنا كمان، غير وقت تاني تلاقيها بتحدفك بشنطتها.

المهم ازاي تعرف تختار بقى اللحظة المثالية وإزاي ممكن تكون الداخلة المثالية اللي تقولها بيها إنك معجب بيها؟، تعالى نفكر سوا وازاي تشتغل الموقف أحسن استغلال

الشوكلاته

مع الشتا بتعمل شغل عالي ويسلام لو شوكلاته سخنة مع سينابون مش الرجالة بس اللي بتيجي بالأكل، اللي قالك أقصر طريق لقلب الراجل معدته، ميعرفش إن الستات قلبها أصلا طالع من حلة محشي.

لو خرجتوا سوا

اوعى تنسى الجاكت وسيبه معاها عشان تكون فرصة تتقابلوا مرة تانية تدهولك خليك ناصح، الحركة دي على قد ما هي قديمة إلا انها بتعمل شغل عالي جدا وبتخليك برنس في نظر البنت.

النيل حلو

النيل والسقعة اعزمها تتمشوا حبه وتاكلوا درة مشوي، هتلاقيها سقعانة شربها حمص دافي واقعدوا في مكان لطيف وقولها كل اللي قلبك،  بس لو الدنيا سقعة بزيادة متطولش عشان متنشفوش.

أهم حاجة تقولها واحدة واحدة

متدخلش صدمة  مرة واحدة عشان على رأي الاخت نانسي كلهم بيجوا بالحنية، الصدمة بتيجي مع البنات حاجة من اتنين إما تقفل منك تمامًا، وتقفل حوار معاك أو تمهد طريق حلو بينكم.

ولو ساقعة بساقعة

جرب تجنن معاه لو بتحب الافكار المجنونة وكلوا ايس كريم وقولها كل حاجة وانتو بتتمشوا في وسط البلد، الجنان الحلو اللي كله هزار وضحك من أكتر الحاجات اللي بتحبها البنات، لآنها مش كائن كئيب زي ما بيتقال بالعكس بكلمتك الحلوة تخليها مبسوطة على طول.