الفورمة

اللؤلؤ سر أناقة شتاء 2017

إسراء الطيب 

اللؤلؤ السنة دي واحد من الأبطال الرئيسية في الموضة لآنه قليل لما كان يلجئ ليه المصممين في فصل الشتا على عكس الصيف والربيع، المرة دي موجود في الشتا على أشكال كتير في الهدوم الاكسسورات والشنط والجزم.

الجديد في استخدامه إنك تقدر تعمل إعادة تدوير للاكسسورات ولهدومك بتاعت السنة اللي فاتت بلمسات بسيطة من حبات لؤلؤ صناعية مش هتكلفة 20 جنيه ويتحول البروفال لتصميم جديد وشيك جدَا زي التصاميم دي..

 

اللؤلؤ مع البلوزات

 بدأت شركات كتير متخصصة في الموضة والأزياء من أخر الصيف اللي فات ده إنها تعيد اكتشاف اللؤلؤ وتضيفه للبلوزات والهدوم، وممكن إنتي كمان تضيفي لبلوزاتك بشكل عشوائي حبات اللؤلؤ الأبيض الكبيرة بتغير الشكل القديم تمامًا وبتتحول لبلوزة تانية على أحدث موضة 

مع البلوفر 

البلوفرات القديمة عندك أو الجديدة وندمت إنك اتشرتيها وعدى معاد ترجعها ممكن تغيري شكلها لتصميم جديد من على النت وصمميه على البلوفر بحبات لؤلؤ نفس اللون أو لون تاني يمشي مع البلوفر. 

الجواكت والبلروهات

اللؤلؤ مش بس بيليق على البلوفر والبلوزة لا ممكن يتنفذ مع أي قطعة في هدومك زي الجواكت الصوف أو الكارديجان التقيلة ومش شرط تمليها لؤلؤ ممكن عند الاكتاف بس أو أساور الأيد حسب ما يريحك. 

 

الكاب

عادة لما بتشتري كاب شتوي بيجي سادة السنة دي مبقاش سادة ونزل موديلات كتير مطعم فيها اللؤلؤ ومغير من الشكل التقليدي للكاب لشكل تاني كله أنوثة ودلع.

الإكسسوار

ومش بس الهدوم اللي اللؤلؤ دخل في تفاصيلها الشتا ده، لا دخل كمان للاكسسورات  سواء المجوهرات اليدوية أو حوالين الرقبة أو في تفاصيل الشعر، ورجع باطلالات البنات لشكل الأميرات من جديد.

كلمات دلالية
شير