السواقة

حاجات بترفع سعر العربيات

 دلوقت في ركود في سوق السيارات سواء كانت مستعملة أو جديدة، وده بسبب ارتفاع سعرها بشكل مبالغ فيه، وبسبب الأزمة الاقتصادية اللي بنمر بيها في مصر، وبقى كل واحد همه الأكبر هو ازاي يحافظ على قيمة وسعر عربيته علشان لو حب يبيعها في أي وقت.

ولأن في عربيات بتتباع بسعر أقل من قيمتها لأسباب كتير منها شكلها الخارجي ونظافتها والإهمال اللي حصل فيها وفي تغيير قطع الغيار البسيطة قبل البيع، وهي حاجات لو اهتم بيها البايع هتحقق له هامش ربح كويس بالمقارنة بسعرها وقت ما اشتراها، الحاجات دي تتلخص في:

الفوانيس

علشان تقدر تخلي الفوانيس تبان نضيفة أغسلها بمعجون الاسنان، ودي حيلة كويسة بتخلي الفوانيس جديدة، بعدها اغسلها بالمنظفات اللي اشترتها من محطات البنزين.

العجل

لازم تهتم بالأربع عجلات نضفها كويس من الأوساخ وأي حاجة فيها علشان تزود قيمة عربيتك.

بريق ولمعان العربية

حاول تلمع العربية بالبوليش وابعد عن مساحيق الغسيل والصابون علشان الحاجات دي بتأثر على لمعان العربية .

الشاسيه وفرش العربية

حافظ على الشاسيه وحاول تنضف فرش العربية من جوا وغير دواسات العربية لو كانت متهالكة واهتم بتنضيف أرضية العربية.

هيكل العربية

ناس كتير بتهتم بهيكل العربيات الخارجي، وبتعتبره من الحاجات المهمة اللي بترفع سعر العربية، لو الهيكل متين ويستحمل بيزيد من سعر العربية لو فيه اي عيوب أو هش شوية بيقلل تمنها، ده غير أن لونه بيفرق يعني العربيات اللي لونها اسود بتبقى اغلى من اي عربية تانية نفس النوع. 

 الراديتير

 حالة الراديتير في العربية بتزود وبتقلل تمنها، بمعى أن لو الراديتير بحالته ومافيهوش تأكل سعر العربية بيزيد لو عكس كدا بيقلل في السعر ويمكن يكون سبب في ان البيعة تتلغي.