Advertisement
Advertisement
حول العالم

حاجات متفكرش تغلط وتعملها وأنت مسافر

إسراء الطيب

حددت معاد الطيارة وخلصت ورقك والتأشيرة وكل حاجة، زي الفل، قبل ما تطلع الطيارة بقى عليك وعلى كام حاجة لازم تركز فيهم زي عينك عشان ترجع بلدك سالم ومش مترحل.

متأمنش لحد

النصابين مفيش أكتر منهم في العالم كله وعندك الساعة بخمسة جنيه أشهر مثال، محدش هيسمى عليك ولا هتفرق معاه حتى أنت سافرت إزاي ولا ان ملكش بيت تنام فيه ولا معاك فلوس دي غربة مش السيدة زينب.

متسبش فلوسك في الاوتيل

لو رايح زيارة وهتقعد في اوتيل أوعى تسيب الحاجات الغالية في أوضة النوم لو أمانات ماشي مفيش متفكرش، أي حاجة ممكن تتسرق وتصبح على الحديدة.د

متخليش فلوسك كلها كاش

حاول فلوسك كلها متبقاش كاش خلي جزء بفيزا تسحب من البنك وقت ما تحب وفلوس تكون معاك في أي وقت كان في مشكلة في الفيزا أو البنك بحيث تأمن نفسك من الناحيتين.

متروحش قبل ما تأمن المكان

قبل ما تقرر تروح بلد بعينها أو مكان معين فيها أو الأوتيل نفسك أعمل سيرش كويس جدًا شوف الرفيو اللي على المكان والخدمات والأمان وكل التفاصيل.

متصرفش وخلاص عشان متضعش

رتب أولوياتك، تاني رتب أولوياتك، متصرفش فلوسك في أي حاجة متعرفش هيجليك فلوس تاني أمتى، ولا هتتصرف إزاي لو قعدت على الحديدة، ركز وخليك في أهم حاجات بس، ومش لازم أوتيل خمس نجوم الهوستيل كويسة وأنت مش رايح عشان تنام في السويت.

 

Advertisement
شير