الجامعة الحياة

طريقك للنجاح في جامعة يبدأ من ملزمة السنتر

إسراء الطيب 

خلصنا ثانوية عامة ودخلنا الجامعة فكرينها دلع ومحاضرات وفسح وغياب، لا يا برنس الكلام ده مش حقيقي الجامعة محتاجة مجهود لو مش ناوي تدبلر من الأول وأهلك يطلعوا عينك ويعيدوا تأهيلك.

بس عشان منعقدهاش عليك خلينا نوازن الأمور، لكن ازاي ممكن تنجح وتتفسح تحضر محاضرات اه ومحاضرات لا، لو لسه معرفتش الكابسولة السحرية في كل كلية ممكن نساعدك توصلها ازاي وتاخدها تفرمها مذاكرة وتضمن التقدير من أول  سنة، ومكانها بيبدأ دايمًا بكلمة ملزمة ومع كلمة ملزمة في الصاحب الدحيح اللي تضمن ينقلك كل حاجة في المحاضرات تقولي دحيح لي أقولك عشان ده يموت ولا أنه يغيب عن محاضرة..

في كل جامعة هتلاقي عدد معين من المكاتب اللي وظيفته الاساسية إنها تجمع محاضرات الدكاترة وبتجند طلبة معينين في كل دفعة ينقللوها المحاضرات بالحرف والنفس ويدوهم بتاع 500 جنيه في الترم وملازم ومراجعات الترم كلها، وفي كل جامعة الوضع بيختلف بس خلينا نشوف أكبر تلت جامعات في القاهرة.

جامعة حلوان 

دي ملازمها مقسومة بين مكانين لو أنت من كليات الشعب تجارة وحقوق هتلاقي عند المترو والسلم جزء، بس بعد التعديلات اللي حصلت مع بداية الدراسة هتضمن تلاقي كله في عند مترو حلوان مش الجامعة هتركب من قدام الجامعة على طول اي مكروباص رايح حلوان وتنزل مكتبة الفرسان دي اول مكتبة وارها مكاتب كتير وكل مكتبة فيها ملازمها وملخصات ومراجعات مستنية اللي يقرأها عشان ينجح.

جامعة عين شمس

في كذا مكان لعين شمس في جوه الجامعة مكتبتين ناحية كلية علوم وهتلاقي فيهم ملازم اداب وملازم حقوق.

وبره الجامعة بقى هتلاقي مكتبة الزعفران هتلاقيها تصوير وملازم ، غير مكتبات مول الزعفران دي بقى في ملازم المراجعات النهائية والملخصات لكليات التجارة والآداب والحقوق غير أدوات علوم والمختبرات.

ده غير ميدان العباسية هتلاقيه مليان كاتب تصوير الكتب والملازم والمراجع وأدوات كلية طب، أما طلاب هندسة فحاجتهم هيلاقوها في ميدان عبده باشا.

جامعة القاهرة

دي بقى عليك وعلى منطقة بين السريات دي كوكب لوحده هتلاقي كل اللي يلزمك هناك كتب ملازم ملخصات مراجع كوكب تاني ولو عايز دروس خصوصية برضو هتلاقيها هناك، وطلبة كلية هندسة وحقوق هيلاقوا ملازم ليهم في مكتبة كلية هندسة بره الحرم.

شير