السواقة

على الطريق .. 5 شخصيات لازم تقابلهم وانت سايق

اللي يسوق ياما حيشوف، لأنك وانت في طريقك لازم تشوف العجب قدامك، هتقابل شخصيات وناس كتير، شخصيات عجيبة وغريبة، هتلاقيها في طريقك وانت سايق.

الغشيم

وده دايمًا هتلاقيه في أي طريق سواق غشيم، بيبقى فاكر نفسه متمكن من السواقة أوي، بيموت في عمل الغرز  والخمسات، هيطلع عينك وانت سايق فخد بالك منه كويس .

الهادي

وده سواق هتلاقيه دايمًا واخد الجنب اليمين في الشارع، بيسوق ع الرايق، تحس انه بيتمشى حتى ولو الطريق فاضي، ده ابعد عنه وحاول تعديه بسرعة، علشان لو مشيت وراه مش هتخلص في يومك .

 العميق

وده اللي بيتفلسف كتير، لما تشوفه هتحس ان في فيلسوف كبير معدي قدامك، بيسوق بطريقة غريبة وعجيبة، بيختار حارات وطرق ماحدش بيمشي فيها غيره .

الحبيب

وده السواق العاطفي اللي دايمًا هتلاقيه مشغل اغاني عاطفية وهو سايق، عايش في كوكب تاني لوحده، تبقى عايز تفرش له الطريق ورد وهو معدي .

البلطجي

وده بيمثل 90 % من السواقين اللي هتقابلهم في طريقك، بالبلدي كده هيبلطج عليك ويعدي قبليك، هتلاقيه دايمًا بيتشاكل مع طوب الأرض وهو ماشي، هيفضل يزمرلك علشان تعديه تقولش رئيس الوزراء.

شير