الحياة الشغل

5 أفكار تساعدك تدفى وأنت في الشغل

إسراء الطيب 

السقعة أول ما بتشد حيلها تلقائي بتلاقي كل الشركات بقت تلك من كل حته لآنها متصممة على نظام تهوية واسع المدى يخلي أكبر نسبة هوا تدخل وتغير النفس اللي في المكان عشان تقلل الأمراض اللي ممكن تحصل بينك وبين زمايلك، بس شايف كله ده بيتقلب عليه أو ما بيدخل الشتا وبتلبس أي لبسة فل كلها تلج وتكتة.

بتلاقي نفسك قاعد في أمان الله وتلاقي ركبك بتخبط في بعض ولا إيدك وقفت خلاص ومش عارف تتحرك، ولا التقيلة بقى وأنت مروح خارج على تلج في الشارع غير التلج اللي كان في المكتب، في الكام سطر الجي ده هنحاول واحدة واحدة نشوف ممكن تدفى ازاي وأنت في مكتبك من غير ما تعطل شغلك.

أعشاب دافية

كل ساعة تقريبا تشرب أعشاب دافية، يانسون، حلبة، حتى شاي، نسكافية، بس الحاجات اللي فيها كافيين متكترش منها عشان مش تسهرك أو تجيب فقر دم، خليك في المضمون، الزنجبيل، القرفة، ودول مفيدين ليك جسديًا. 

جاكت احتياطي

خلي جاكت أو اسكارف احتياطي في المكتب، عشان اليوم اللي تتفاجئ غنه سقعة تكون مطمن أنك هتدفى، ومتقعدش متكتك في مكانك مش عارف تشتغل من التلج.

امشي في مكانك

كل ساعة ولا حاجة حاولوا تمشوا في مكانكم حتى تخروجوا لحد بره وترجعوا امشي في المكان بيولد طاقة ودي بتساعدك إنك تحس بالدفى أكتر.

افرك ايدك

وأنت في مكانك حبه في حبه بعد الفرك هتلاقي ايدك بدأت تتدفى ومجرد ما دفيت هتنقل الدفا لباقي جسمك والرعشة تقل وتبقى أدفى شوية. 

الكالسون السحري

 خليك مصري أصيل وعليك وعلى الكالسون، بيدفيك كويس جدًا ويخلي جسمك ادفى طول اليوم حتى لو نزلت تلج ما أنت لابس بنطلونين يعني لازم تدفى بس اختار واحد ميكلكعش الهدوم في بعض.