الترفيه سينما

5 مشاهد مكررة في كل الأفلام العربي

الافلام العربية كلها بتنقل  كتير من بعض نفس المشاهد بطريقة مكررة، ومنحوتة مشاهد  بتبقى عارف ايه اللي هيحصل فيها من قبل ماتشوفها، حاجة كدا زي الكوبي بيست، نفس الكلام ونفس الديكورات بتحصل في كل فيلم، زي مثلًا:

الدكتور

الدكتور اللي هتلقيه خرج من اوضة العمليات ويقول لأهل المريض احنا عملنا اللي علينا والباقي على ربنا، جملة واحدة مكررة بتتقال وسط عيلة المريض، مع شوية أفورة المشهد هيكمل ويبقى عال العال.

القهوجي

القهوجي دايمًا  هتلاقيه لابس مريلة غريبة مش عارف جايبينها منين، ودايمًا بيقول أيوة جاي  مش عارف ليه، ودي الجملة الأشهر في كل الأفلام، هتتلاقيه ماسك صينية الطلبات في ايده وماشي مستعجل.

البواب

 البواب دايمًا بيضحك عليه بسيجارة فرط ويقول كل المعلومات اللي يعرفها عن سكان العمارة، ماتعرفش ليه بس هو لازم محشور في كل سيناريو في معظم الأفلام، لو عايز اي معلومة ما تقلقش البطل هيجيبها بسيجارة وكوباية شاي.

الظابط

البوليس دايمًا بيجي متأخر في أخر الفيلم بعد ما الاكشن يشتغل بتاع البطل ويبين مهاراته في الضرب والجري، وده شيء طبيعي مش هو البطل لازم يثبت لكل الناس أنه فاندام السينما المصرية، وده مشهد منحوت في كل الافلام.

التايه

لو البطل بيدور على أي حد  تاني  هتلاقي وصل للمكان اللي موجود فيه بالعربية بعد ما اللي بيدور عليه يمشي بلحظة في نفس المشهد من غير مايشوفه

شير