الكراش للبنات فقط

تتصرفي ازاي لو عرفتي إن حبيب صاحبتك بيخونها

إسراء الطيب 

أقرب صاحبة ليكي بتكون بمثابة أخت تانية بتخافي عليها زي ما بتخافي على نفسك وعلى حياتك الشخصية، لكن لو شاءت الأقدار إنك تكوني الشخص اللي اكتشف إن خطيبها وحب عمرها اللي قاعدة ليل نهار بتحكيلك عنه بيخوها مع واحدة تانية، في موقف زي ده هتتصرفي ازاي؟

هنا ممكن تتهوري وتروحي تفضحيه وتفشكلي الخطوبة اللي صاحبتك شقيت لحد ما اقنعت اهلها بيه وانتي أكتر واحدة عارفة هي بتحبه قد أي وإنها مش هتعرف تعيش من غيره، او إنك تمشي على الخطوات دي في محاولة إصلاح الموقف.

التلميح الغير مباشر

مرحلة التلميح اساسها إنك بتعرفيه بشكل أو بأخر أنه مفضوح وإن اللعب بالديل أخرته وحشة، وتبدأي بقى تحكي قصص أصل فلان خان خطيبته فحصل مش عارف أي وعلان عمل أي.

التحذير الضمني

دي المرحلة التانية لو لقتيه لسه عامل فيها من بنها ومقضيها ولا همه حد، تبدأي، تعرفيه إنك فاهمة، وإنه يلم نفسه لو عايز يكمل مع صاحبتك، ولو باقي على العشرة معاها وإنه مش هيلاقي حد يحبه بجنون زيها.

التهديد الصريح 

هنا بقى لو ولاهمه بتروحيله هو مع البنت التانية بشكل مباشر تعملي عليهم كبسه وتعرفسه إنه لو مبظبطش يسيب صحبتك أسهل، وتعرفي البنت التانية مقامها، وتطرديها طردة معتبرة، وتعرفيه إن لو الوضع اتكرر بأي شكل من الاشكال مش هتسكتي.

 

خرجيه بره قلبها

لو لقتيه من صنف ديل الكلب عمره ما ينعدل، ابدأي كرهي صحبتك فيه، واقعدي اذكري سلبيات وحاجات كتير فيه مش كويسة وانتي ادرى بالحاجات اللي صاحبتك تطيق العما ولا تطيقها.

فرفشيها

لو خلاص مبقاش في نصيب ما بين الاتنين وهو مش عارف قيمتها وهي فهمت ده وقررت الانفصال، لازم تقفي جنبها وتعرفيها إنه مش أخر واحد وإنه هو اللي خسرك، ولازم تخرجيها وتخليها تنبسط 24 ساعة في 24 ساعة.