الكراش للبنات فقط

علامات تقولك إن الكراش راح من إيدك

إسراء الطيب 

خلينا متفقين إن يكون في حد بتكراشي عليه ده شئ جميل، والجمل إن يكون في مشاعر حلوة جواكي، بس أي هتفضل مشاعر جواكي وبس، مش بتفكري تخليه مشاعر متبادلة، طب لو فضلت مستخبية يا ترى ممكن تكون النتيجة أي.

الصمت عامة بيكون نتيجته حاجة من اتنين تيجي معجزة إلهية نادرة الوجود تخليه يبصلك ولا يفكر فيكي، أو تيجي واحدة تانية تاخده منك وإنتي لسه قاعة تشكي صمتك لخيالك وتندمي على حظك الهباب في الحب وإن ملكيش نصيب في الدنيا وكده.

خلينا نركز كده إن الصمت مش الحل ولا إنك تدلقي عليه الحل، لكن تعرفي إمتى إن الوقت خلاص ضاع وراحت عليكي وإنه ظبطت مع واحدة تانية مفضلتش صامتة.

مختفي بقاله مدة

بطل يفتح فيسبوك داخل في كذا يوم بتكلميه على التلفون كزملا تطمني عليه مش بيرد، ولا عارفة توصلي لمعلومة ليه، وكلمتي صاحبة صاحبتك  عشان صاحبها يعرفه فيطمنلك، وإذا فجاءة تلاقيه اخر مرة كان في كافية مع واحدة من دفعة أصغر منكم بسنة كنتوا قبلتوها في الكافتيريا مرة وقعدت تسبله وإنتي كنتي قفص جوافة في النص.

 

بينزل بوستات رومانسية

رجع يفتح الفيسبوك بتاعه بعد أسبوع ولقتيه هيمات على نفسه وبدأ ينزل بوستات رومانسية وأغاني أم كلثوم بقى وعايش حالة حب، وازاي تسعد قلب حبيبك، ويسلام بقى لو كنتوا سحاب ودخل يسألك على هدية حلوة عشان عيد ميلاد ولما تقوليله مين يقولك ابن عمي ولا خالي واختي الصغيرة ويعمل فيها عبيط على اساس إنه مكنش فاهم وإنتي مبحلقاله 24 ساعة. 

 

رجع ظهر وبدأ ينزل كذا صورة مع نفس البنت

الموضوع خرج من مجرد بوستات بتنزل بقى واتحول لصور بينزلها على انستجرام كتير بما إن أهله مش على انستجرام بس حبيبة القلب عملاله فولو فهتشوف عادي، ويقعد يكلم عنها بقى وعن رومانسية ولو قاعدين مع بعض في أي تجمع تلاقيه اتحول رومانسية، لكن عشان ميفضحش الموضوع من الأول هتلاقي في  أول مرة ينزل صورتها معاه ومعاهم ناس تانية وتجمع ويكتب كلمتين حلوين عن قد أي اليوم كان حلو، بعدها ينزل صورته معاها وغنه قال أي قابلها صدفة وقد أي أحلى صدفة دي ولا أي، وهكذا لحد ما تلاقي صورة الخطوبة وإنتي قاعدة.

 

 

بدأ يخف هزار في الكومنتات

إذ فجاءة وإنتي بتابعي الفيسبوك بتاعه لقتيه بيمسك نفسه عن الهزار غير زمان، وبدأ يقلل كلامه مع البنات، واتحول الموضوع لدماغ تانية بقى، وتيجي تكلميه يتهرب منك، لا متحسبيش ده من دماغه لا دي تعليمات وواضح كمان إنها قوية جدا ومتفكريش فيه بعد كده لأنه كده رسمي فهمي نظمي ارتبط ومفيش فرصة وخلي الصمت ينفعك يا ناصحة.