الفورمة

متخليش الشتا يبينك بكبوظة

إسراء الطيب 

كل بنت بتدور دايما على الحلول اللي تخليها جميلة في كل وقت وتبان أجمل ما فيها لنفسها قبل ما يكون لحبيبها أو زوجها، وعلى قد ما الشتا فصل جميل وهادي إلا أن من أقصى عيوبه في حياة البنت إنه بيخليها تلبس عشروميت حاجة فوق بعض وتبان بكبوظة فعليًا.

طيب لو إنتي رفيعة أو مليانة عادي مش الوزن اللي هيحدد شخصيتك في التعامل مع الناس أهم حاجة تكوني بتحبي نفسك زي ما هي وتقدريها وعشان إنتي بتقدريها صح، هنساعدك في كام معلومة تاخدي بالك منها وإنتي بتشتري هدومك في العموم والشتوي خاصة.

الألوان الغامقة 

الألوان الغامقة في العموم بتكون هي ملك الألوان كلها، لآنها بتعمل خداع بصري جدًا وبتبينك أرفع من وزنك وممكن تنسقيها مع الأجزاء التخينة في في جسمك بحيث تبان أرشق، واجمل والعكس طبعًا مع الألوان الفاتحة.

بلاش الأوفر سايز 

الأوفر سايز طالع موضة السنة دي، واللي ميعرفوش إنك تلبس جاكت صوف مثل أو كارديجان واسع أعلى من مقاسك نمرتين تلاتة كده، فبلاش منه بالذات لو جسمك مليان لآنه هيبينك أكبر من وزنك أضعاف.

بلاش بلوفرات مخططة بالعرض 

لآن الخطوط العريضة في العموم بتعرض الجسم كله حتى بيستغلها متخصصين الديكور عشان يضاعفوا المساحات ويعملوا خداع بصري، فالأفضل ليكي إما مخططة بالطول أو مقلمة

بلاش بلوفرات ضيقة 

خليكي دايما في الوسط ولا الواسع ولا الضيق لآن الضيق بيبن برضو إنك مش بس مليانة لا إن الهدوم بتتفرتك عليكي وده مش صح خليكي في المناسب لجسمك يكون فضفاض بس ولا أوفر سايز ولا ضيق لاصق.

اختاري اللي ينسب رسمة جسمك

يعني متروحيش ورا أي موضة طالعة ولا تختاري تصاميم تبين أي ديفو في جسمك، يعني لو مليانة من فوق متختاريش البلوزات اللي بتقسم الصدر فتبينك اتخن وكذلك مع منطقة الجناب.