المشاهير ليه 2017

5 أفلام أثارت الجدل في 2017 أحدهم لم يكتمل بعد

إسراء الطيب

2017 كانت سنة مليانة أحداث فنية كتير وأخبار كتير ومنافسات ما بين الفنانيين وأفلامهم، وجمهورهم على السوشيال ميديا، غير كمان منافسة الايرادات، ومكنش كل ده بس لا منافسة الجيل الكبير مع الجديد ده كان طعم تاني.

ومن الحاجات اللي اثرت في السنة دي مخصوص كان أساليب الدعايا الجديدة والغموض اللي بقى يرتبط بالأفلام والجمهور بتاعها ونظام الخدع وغيره من أساليب التشويق اللي بقت السلاح الاساسي لشركات الانتاج.

فيلم بشتري راجل 

الفيلم عمل ضجة جامدة جدًا من قبل ما ينزل السينمات، واستخدمت الشركة المنتجة اسلوب دعايا مختلف على المصريين وغامروا بحرق قصة الفيلم، إنهم يعملوا صفحة على الفيسبوك بنفس عنوان الفيلم وواحدة بتطلب حيوانات منوية في مقابل مادي عشان عايزة تكون أم، واتعمل على الصفحة هجوم كبير لدرجة إنها اتقفلت واتعمل اربعة غيرها ، وعملت حاجة جدل كبيرة، لحد ما اتعرف إن دي قصة الفيلم وانها عايزاهم عن طريق جواز شعري.

 فيلم “بشتري راجل” للنجمة نيللي كريم، والمؤلفة إيناس لطفي، والمخرج محمد علي، وشارك في بطولته محمد ممدوح، لطفي لبيب، ليلى عز العرب، ومحمد حاتم، ووصلت إيرادات الفيلم في دور العرض حوالي 6 ملايين جنيه.

الخلية 

رغم الانتقادات الكبيرة اللي اتعرض لها أحمد عز في الفترة الأخيرة بعد ما أثبتت المحكمة أنه والد تؤام زينه وإن الحمض النووي أكد إنه الأب، ده خلاه يتحول في وجه نظر ناس كتير لشخص سئ مرفوض من المجتمع، لآنه جسد دور الأب المستهتر، لكن على عكس ما اتوقع النقاد بصعوبة قدر عز بفيلم قوي يشد جمهوره من جديد ويكسب ثقته اللي قيمة من الناحية الفنية مش حياته الخاصة.

 ، فيلم الخلية بطولة أحمد عز، وسيناريو وحوار صلاح الجهيني، قصة وإخراج طارق العريان، وشارك في بطولته أمينة خليل وسامر المصري، وسجل الفيلم أعلى إيرادات وصلت أكثر من 53 مليون جنيه.

الكنز

الكلام كان كتير على الفيلم من قبل نزوله لآكتر من سبب منها اكتشاف نجوم كبار في أدوار مختلفة تماما عن اللي اتعودوا الظهور بيها غير أن محمد رمضان أعلن انه من جزئين و أنه من أهم الافلام في مسيرته غير أنه اتاجل أكتر من مرة، من العيد للعيد اللي بعده، وبعد ما كان المفروض ينزل الجزئين مع بعض خلوه واحد بس من غير ما يكملوا قصة الفيلم وسابوا الجمهور متشوق للنهاية. 

الفيلم من بطولة محمد رمضان، هند صبري، محمد سعد، أحمد رزق، أمينة خليل، وهاني عادل، سيناريو وحوار عبدالرحيم كمال عن قصة شريف عرفةو إخراجه ووصلت إيرادات الفيلم حوالي 19 مليون جنيه.

هروب إضطراري

الفيلم قدر يجمع عدد ضخم من نجوم الشباك كلهم في فيلم واحد، من بينهم النجم أمير كرارة اللي كان لسه خارج من رمضان بدور قوي ففي مسلسل كلبش اللي حقق أعلى مشاهدات بين كل مسلسلات رمضان، غير قصة الفيلم اللي جمعت الرومانسية والأكشن ونجوم مسرح مصر.

فيلم “هروب اضطراري” بطولة أحمد السقا، والمؤلف محمد سيد  بشير، والمخرج أحمد خالد موسى، وشارك في بطولته غادة عادل، أمير كرارة، مصطفى خاطر، وفتحي عبدالوهاب، وعملت إيراداته حوالي 52 مليون جنيه.